ខេត្តប៉ៃលិន៖ ចោរចូលគាស់ផ្ទះលួចទ្រព្យសម្បត្តិពលករពីរនាក់ប្ដីប្រពន្ធក្នុងពេលពួកគេត្រូវបានអាជ្ញាធរថៃចាប់ធ្វើចត្តាឡីស័កនៅក្នុងប្រទេសថៃអស់ពេល១៤ថ្ងៃ។

ហេតុការណ៍ខាងលើនេះ បានកើតឡើងកាលពីយប់ថ្ងៃទី២២ ខែតុលា ឆ្នាំ២០២១ ស្ថិតនៅក្នុងភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន ដែលមានម្ចាស់ផ្ទះឈ្មោះ ស៊្រុន គុន្ធែ ភេទស្រី អាយុ៣៩ឆ្នាំ និងប្តីឈ្មោះ ណុប សេក អាយុ៤២ឆ្នាំ រស់នៅភូមិប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន ។

ម្ចាស់ផ្ទះតែងឆ្លងដែនទៅធ្វើការនៅព្រំដែនថៃអស់រយៈពេល២ឆ្នាំមកហើយ តែដោយសារតែពួកគេមានជាប់ពាក់ព័ន្ធនឹងអ្នកជំងឺកូវីដ១៩នៅកន្លែងដែលពួកគេធ្វើការទើបត្រូវបានអាជ្ញាធរថៃដាក់ឱ្យធ្វើចត្តាឡីស័ក។

ម្តាយម្ចាស់ផ្ទះ អ្នកស្រី ត្រោក ខេន អាយុ៥៨ឆ្នាំ ឱ្យដឹងដែរថា ចោរបានលួចគាស់ផ្ទះនឹងប្រមូលសម្ភារៈក្នុងផ្ទះស្ទើអស់ ខណៈកូនរបស់គាត់មិនបានត្រលប់មកពីថៃវិញដោយសារជាប់ធ្វើចត្តាឡីស័កក្នុងប្រទេសនោះ។

អ្នកស្រី ត្រោក ខេន ថាចោរគាស់ផ្ទះទាំងអស់នេះគឺជាអ្នកដែលប្រើប្រាស់គ្រឿងញៀន រស់នៅក្បែរៗ ផ្ទះជនរងគ្រោះ នឹងត្រូវបាននគរបាលចាប់ឃាត់ខ្លួនអស់ហើយខណ:ពួកគេចូលទៅលួចទូរស័ព្ទព្រះសង្ឃក្នុងវត្តកាលពីពេលថ្មីៗនេះ៕